Dhulkeed jecel

Dhulkeed jecel

Maansadan DHulkeed jecel wax aan tiriyey  18/9/2014  waxana iggu dhalisay iyada oo lasoo gabagabaynayay tababar kadib lagu soo xidhayay majaajilo ku saabsan tahriibta.

Waxa igu soo dhacday tibxaha hore ee maansada, waxa aanan dhameeyay habeenimadii kuna daray riwaayadaa oo aan jilaa ka ahaa loogana dhigay dhextaal ay leedahay riwayadaasi.

Maansada waxa aan kaga hadlayaa dhibkaa tahriibka iyo qaybaha uu leeyahay dhibkaasi, dhalintana waxa aan ku dareensiinayaa sida ay dhulkooda sharfta ugu leeyihiin balse ay u qiimo dhici doonaan xataa hadii ay gaadhaan halka ay u ham iyo dig leeyihiin.

Waxba yaanan ku dheeraan maansada fasirideeda e’ waxa ay ku bilaabmaysaasida tan:-

  

Ayaamahanba dhiiladu

Dhulkeenay ku idishahay

Waxa lagu dhadhabayaa

Dhibkan ay barbaartiyo

Ku hodmeen dhaqaalihi

Ana wayla dhaygage

Maansadan dhulkeed jecel

Ayaan wixii dhagtyadiyo

Aan ka dhuuxay ereyada

Dadku ay ka dhurayaan

Dhabahaa lasii maro

Iyo meesha lagu dhagay

Ee loo dhul socod yahay

Inaan idiin kusoo dhigo

Ee idina dhuuxoo

Dhugta maansadaydaa.

     ********

DHalineey barbaareey

Dhibaatada tahriibtyo

Dhaawacyada fidaayiyo

Dhimashada kor dhaysiyo

Dhalandhoolka dheeriyo

Ma dhaafaanka joogiyo

Dhibaataynta gaalkiyo

Qabsashada dhankagiyo

Ku dhuqsiinta jeelkee

Laga rabo dhaqaaliyo

Dhigdhigida jidhkaagee

Dharag doolar lagu rabo

Hadaad dhaafto meeshaa

Ood yurub dhex gaadhana

Sharaf dhigida meeshaa

Baabiinta dhaqankaa

Hadaad imika dhiintahay

Dhabaqnimada kuu taal

Maansadan dhulkeed jece

Aan kuugu dheegee

Maskaxdiin dhex dhiga oo

Ka dhawrsada xumaantaa

  ***********

Dharaarahan tahriibaa

Dhaqankeena raacdoo

Dhalintii sumaysoo

Dhoofkii fogaabaa

Galin looga dhigayoo

Dhibaatadi hortaalaa

Laga dhuunshay ragaoo

Waxa loo dhalaalshaa

Yurub in uu dhex tagayoo

Raaxo uu dhadhaminoo

Dharag doolar joogiye

Waxaan haatan soo dhigi

Dhibaatada la qariyee

Dhalineey barbaareey

Dhuuxa maansadaydaa

*********

Dhabahaa la marayaa

Moorgan dhaarsan baa taxan

Ku dhadhabaya muuqaa

Dhab markuu ku siiyana

Qolkiisuu ku dhigan oo

Xabsi kaaga dhigiyoo

Dheg waxii lasaariyo

Kuu dhiibi tilifoon

Markaasuu dharaartaa

Kugu odhan dhakhsaw hadal

Ku dhufoo rerkiinii

Soo dira dhaqaaliyo

Doolar aan la dheerayn

Wakhtiguu dhag soo odhan

Xawaaladana ku soo dhici

Dhuntaadaan hadii kale

Kala dhigi wakhtigan oo

Kala dhufan surkaagiyo

Jismigaaga dhaydaa

 Hadaad dhawaaqi waydana

Kula dhurmi maayee

Adigoo hor dhigan buu

Kala dhigi jidhkkgoo

Kala dhufan wadnaa iyo

Beerkiyo laf dhabartee

Dhalineey barbaareey

Ka dhawrsada xumaantaa

***********

Hadaad intaa bal dhaaftana

Doon aan dhisnayniyo

Badda dhaaranaysee

Aan laga dhur suginiyo

Waxad gali dhib kaa adag

Markasaad adoo dhadhay

Boggu beerka kugu dhagay

 Dhuuntuna qalayl  tahay

Dhibiq biyaana aan helin

Nafta aad dhigaysaa

Soo dhawaynta mawdkana

Dhinac aad ka galaysaa

********

Haadaad intaa bal dhaaftoo

Yurubtii dhexgaadhana

Waxa aan la dhaafayn

Dhaqan dila in ay too

Diinta dhadhiya in ay too

Khayrka dhaaba in ay too

Sharka dhooba in ay too

Rag dhufaana in ay too

Dumar dhuuja in ay too

Taran dhaafa in ay tee

Libaax dhaarta waxaa tahay

marka aad is dhawr tee

dlkaagaa dhex joogtee

intaad yurub dhur maysana

dhale bilaa mamuusoo

waxaa tahay dharbaaqiye

**********

Ama xoole dhaqanoo

Loo dhigaayo cawsoo

La dhahaayo xaaxeey

********

Ama dhale maraanoo

Irbad lagu dhuq siiyoo

Raganimo la dhaafshoo

Meelahaa dhacdhacayoo

Uf la dhahayo baa tahay

**********

Dhiriq aan la tirinoo

Eygay dhaqanayaan

Sharaf uu bal dhaamoo

Dhinac looga baydhoo

An la dhawrin baa tahay

**********

Nin dhaqan la dhaafshoo

Laga dhawray mid kalanoo

Tuur dhabar kulaa tahay

**********

Nin dhaxani haysoo

Dhar ka wayn kujira oo

Koofiyad dhan jeedshoo

Soo dhadhay ayaa tahay

*******

Intaas oo dhan baa  tahay

Inta aanan soo dhigin

Ayaa waliba kuu dhugin

**********

Dhalineey barbaareey

Dhalad kuwaan wadaagnoow

Dhexdeedaa hargaysiy

Burco kuwaan ku dheelnoow

awdal dhinac yadeediyo

dhaclihii sanaagiyo

sool dhoobadeediyo

saaxil dhaxan la’aantii

dhag dhag aanu boodnaow

hadhka geedka dhumucdaleh

iyo hawd dhan kiisii

beeraa dhexdoodiyo

dhulka gabilay ee wayn

kula dhuujay liintoow

 kula dhexeen la gudayoow

dhibaatadii taxnaydee

tixdaydaa ku soo dhigay

kkuligiin ka dhaartoo

ka dhawrsada xumaanataa.

dhamaad